მას შემდეგ, რაც პარლამენტმა პროპორციულ სისტემაზე გადასვლას მხარი არ დაუჭირა, პოლიტიკურმა პროცესებმა ქუჩაში გადაინაცვლა. გააქტიურდა ახალგაზრდული მოძრაობა „გაბედე“, რომელშიც რამდენიმე პარტიის ახალგაზრდული ფრთის წარმომადგენელია გაერთიანებული. „გაბედეს“ ერთ-ერთი აქტიური წევრია ბექა ნათელაშვილი, რომელიც „ლეიბორისტული პარტიის“ ლიდერის, შალვა ნათელაშვილის შვილი და დუშეთის საკრებულოს დეპუტატია. სხვათა შორის, ბექა ნათელაშვილმა გუშინ პარლამენტთან მოსამართლეების უვადოდ არჩევის გასაპროტესტებლად აქცია-პერფორმანსი მოაწყო, სადაც სიმბოლურად ნაძვის ხე მორთო და განაცხადა, რომ „სათამაშოები“ ხელისუფლების მიერ არჩეული მოსამართლეები არიან. „ჰოთნიუსი“ ბექა ნათელაშვილს ესაურა:

- ბექა, რატომ გადაწყვიტეთ პოლიტიკაში აქტიურად ჩაბმა?

- არ მქონია სურვილი, აქტიურ პოლიტიკაში ვყოფილიყავი, უბრალოდ, ისეთი სამარცხვინო სიტუაცია შეიქმნა, რომ ჩვენი ჩართულობით მაგალითი უნდა მივცეთ სხვა ახალგზარდებს, რადგან სხვაგვარად ცვლილებებს ვერ მივიღებთ.

- რა გახდა თქვენთვის ქუჩაში გასვლის მთავარი მიზეზი?

- იმედიანად ვიყავით 20 ივნისის შემდეგ, დაგვპირდნენ პროპორციულ არჩევნებს და ამ კანონპროექტის ჩავარდნამ ყველაზე იმოქმედა, რადგან არჩევანის უფლებას გვართმევდნენ. ისედაც ნიჰილიზმია საზოგადოებაში, არჩევნებზე არ დადიან, ახალგაზრდების აქტივობა დაბალია არჩევნებზე და მაჟორიტარული სისტემა თუ შენარჩუნდა, ისევ ორპოლუსიანობა იქნება და შესაბამისად, გვინდა, არჩევნებზე მისვლას აზრი დავუბრუნოთ.

- მოძრაობაში - „გაბედე“ ახალგაზრდები კონკრეტული იდეის გარშემო შეიკრიბეთ?

- დიახ, ეს ახალგაზრდები არიან სხვადასხვა პარტიის ახალგაზრდული ორგანიზაციის წევრები, რომლებიც აქამდე დამოუკიდებლად მოქმედებდნენ და ახლა გავაერთიანეთ ახალგაზრდული ძალა, რადგან დიდი რესურსია ადამიანური და ინტელექტუალური თვალსაზრისით. ამის საფუძველზე გახდა პოპულარული ეს მოძრაობა ძალიან მოკლე პერიოდში. 12 დღეა, მგონი, გასული, რაც „გაბედე“ შეიქმნა...

- და ამ რამდენიმე დღეში უკვე რამდენჯერმე დაგაკავეს, არა?

- დიახ, ორჯერ. ერთხელ სუს-ის შენობასთან დაგვაკავეს, ზებრა გადასასვლელზე ინტენისურად გადავდიოდით და გადმოვდიოდით, პოლიციელები დაიბნენ, რადგან კანონს არ ვარღვევდით, მარამ მაინც დაგვაკავეს, თუმცა დაკავების მიზეზი ვერ დაასაბუთეს. მეორედ - მცხეთაში: ჩვენ გაგვისწორდნენ ფიზიკურად და ჩვენვე დაგვაკავეს. სასამართლო გაიმართა 10 დეკემბერს, პოლიციამ ვერც მომწეები წარადგინა, ვერც - მტკიცებულებები და მხოლოდ 4 პოლიციელი ამბობდა, როგორ ვიგინებოდით. საბოლოოდ, აღმოჩნდა, რომ ეს 4 პოლიციელი აქციაზე არ ყოფილა. ეს ჩვენი ვიდეოკადრებითა და ფოტოებით დავამტკიცეთ. მოსამართლეს, წესით, იქვე უნდა გამოეტანა განაჩენი, მაგრამ თქვა, რომ რამდენიმე დღეში გამოიტანდა გადაწყვეტილებას. 500-დან 1000 ლარამდე ჯარიმას ითხოვს მეორე მხარე, თუმცა თუ სამართლიანობის ნაპერწკალი არსებობს, ჯარიმაც არ უნდა დაგვეკისროს.

- პროპორციულ არჩევნებს ითხოვთ, თქვენთვის რიგგარეშე არჩევნებს გადამწყვეტი მნიშვნელობა აქვს?

- ვითხოვთ პროპორციულ არჩევნებს. რაც უფრო დიდხანს იქნება „ქართული ოცნება“ ხელისუფლებაში, მით უფრო ბევრ რაღაცას გააფუჭებს და უკეთესია, რიგგარეშე არჩევნები დაინიშნოს, რომ მალე დაიწყოს ქვეყნის განვითარება. ეს მოხდება იმ შემთხვევაში, თუ მრავალპარტიული პარლამენტი გვექნება. „ქართულმა ოცნებამ“ არჩევნებზე 47% აიღო და 115 ხმა აქვს პარლამენტში, ეს უსამართლობაა.

- ისე, როგორ ფიქრობთ, მამათქვენის პოლიტიკური პერსონა თქვენს კარიერაში დადებით როლს ითამაშებს თუ პირიქით, ხელს შეგიშლით?

- ზოგისთვის ის პოზიტიური პერსონაა, ზოგისთვის - ნეგატიური. ჩემთვის შემაკავებელი არ იქნება, თუმცა არც ისე მინდა, პრივილეგიებით ვსარგებლობდე, რადგან შალვა მამაჩემია და სწორედ ამიტომ ვმოქმედებთ დამოუკიდებლად „გაბედეს“ ფორმატში. ამ მოძრაობაში სხვა პოლიტიკოსთა შვილებიც არიან და გვინდა, მშობლების „ჩრდილიდან“ გამოვიდეთ.

- „ამბოხებულმა“ დეპუტატმა, დიმიტრი ხუნდაძემ ჩემთან ინტერვიუში თქვა, ოპოზიციურ პარტიებში შვილები წამოვიდნენო და თქვენც დაგასახელათ, ოჯახური პარტიები გვაქვს და ოჯახურ სარგებელზე ფიქრობენო. რას უპასუხებთ ხუნდაძეს, პოლიტიკაში სარგებლისთვის მოხვედით?

- იმას კი არ ცდილობენ, პლუსები ან მინუსები დაინახონ ჩვენს საუბარში, გადადიან სრულიად სხვა საკითხზე. რა მნიშვნელობა აქვს, ვისი შვილები ვართ, სჯობს, იმაზე გვიპასუხონ, რა კითხვებსაც ვუსვამთ. მე რომ ვთქვა, რადგან ბერა ბიძინა ივანიშვილის შვილია, ამიტომ არ ვეთანხმები-მეთქი, ეს ხომ არასწორი იქნება? ეს არასწორი მიდგომაა და ეს მეთოდებიღა დარჩათ, რადგან სხვა გზით ვეღარ ახერხებენ ჩვენთვის კონკურენციის გაწევას. სადაც მივდივართ, ყველგან გარბიან, რადგან არ აქვთ პასუხები ჩვენს კითხვებზე.

- საზოგადოება ახალგაზრდების შემოსვლას პოლიტიკურ ველზე იმედით ელოდება. როგორ ფიქრობთ, ის, რაც თქვენმა მამებმა ვერ შეძლეს, მაგალითად, შალვა ნათელაშვილი იმის მიუხედავად, რომ წლებია, პოლიტიკაშია, ხელისუფლებაში არასდროს ყოფილა, გაქვთ ამბიცია და მოლოდინი, რომ თქვენ შეძლებთ?

- ყველაფერში საჭიროა ცვლილებები და საქართველოში დიდი ხანია, ახალგაზრდები და ახალი სახეები არავის უნახავს პოლიტიკაში. „გავრილოვის ღამის“ შემდეგ გააქტიურდნენ ახალგაზრდები და ვფიქრობ, ეს ჯანსაღი პროცესია. რა თქმა უნდა, იმედი გვაქვს. იმას კი არ ვცდილობთ, ჩავაჩოჩოთ ეს ადამიანები, გვინდა, საერთო საქმე ვაკეთოთ ყველამ. უფროსებმა და ახალგაზრდებმა ხელი შევუწყოთ ერთმანეთს და ჩვენი სხვანაირი ხედვა კონკრეტული პრობლემის მოსაგვარებლად ეფექტური იყოს.

- როცა პირველად დაგაკავეს, ბატონმა შალვამ განაცხადა, მე არ ვაქეზებ ბექას, პირიქით, სულ ვერიდებოდი მის აქტიურ პოლიტიკაში ჩაბმასო. საინტერესოა, შეუთანხმდით მამას, როცა „გაბედეს“ ფორმატში ასე აქტიურად ჩაერთეთ?

- არა. ამ მოძრაობის შექმნა იყო ჩემი და რამდენიმე მეგობრის ინიციატივა. შეიძლება, საქმის კურსში ჩავაყენოთ, როცა მედიისგან გაშუქება გვჭირდება, როცა რაიმე აქტივობას ვგეგმავთ, ანუ ტექნიკურ საკითხებზე ვთხოვთ დახმარებას, თორემ ვინმემ გვითხრას, რამე გააპროტესტეთო, მსგავსი პრეცედენტი არც ყოფილა და არც იქნება.

- მამათქვენს ხშირად ეწინააღმდეგებით პოლიტიკურ საკითხებში?

- ბევრ საკითხზე ვთანხმდებით, თუმცა ბევრზე სხვადასხვაგვარი ხედვა გვაქვს. როცა ვეწინააღმდეგები, არც მაგის პრობლემა მაქვს, რომ ვუთხრა, რადგან სულ კარგს და კომპლიმენტს რომ ეუბნები ოჯახის წევრს ან მეგობარს, ალბათ, მისი მტერი უფრო ხარ, ვიდრე - მეგობარი.

- ბექა, ბევრი საყვედურობს ოპოზიციას, სამკაციანი პარტიები არიან და ადამიანური რესურსის დეფიციტი აქვთო. შვილების შემოყვანა პოლიტიკურ ასპარეზზე იმას ხომ არ ნიშნავს, რომ პარტიებს აქტივისტების, „ფეისების“ მოძებნა უჭირთ?

- ზოგადად, ადამიანური რესურსის პრობლემა, ალბათ, ყველა პარტიას აქვს, გარდა იმ პარტიებისა, ვისაც დიდი ფინანსური რესურსი აქვს, თუმცა ჩვენთან, პარტიაში ბევრი კადრია და მე „ლეიბორისტური პარტიის“ ხაზით არ ჩავრთულვარ ამ პროცესებში, პარტიიდან საკრებულოს დეპუტატი გავხდი, მაგრამ სატელევიზიოდ ამიტომ არ გამოვჩენილვარ და აქტიურ პოლიტიკაში „ლეიბორისტული პარტიის“ სახელით არ ჩავრთულვარ. ჩემი ჩართვაც მარტო იმას არ ემსახურება, რომ „ლეიბორისტულ პარტიას“ გამოვადგე. ჩემი მიზანია, სხვა ახალგაზრდებიც ჩაერთონ და ვიყო ერთგვარი მოტივატორი. სხვათა შორის, გადავწყვიტეთ, გამოვიდეთ პარტიების ახალგაზრდული მოძრაობის ფორმატიდან და ბლანკები გავუშვით ინტერნეტში ამ მოძრაობაში შემოერთებასთან დაკავშირებით. ერთ კვირაში 150-მდე ახალგაზრდა შემოგვიერთდა.

- პარტიად ჩამოყალიბებას ხომ არ გეგმავთ?

- არა, მაგრამ გვინდა, დაიწყოს მოძრაობა, რომელიც მასშტაბური გახდება, რეგიონებშიც ვქმნით მოძრაობებს. ამ შემთხვევაში, მხოლოდ პროპორციული სისტემის საკითხზე ვართ გაერთიანებულმი, თუმცა გვაქვს ბევრი თანხვედრა სხვადასხვა საკითხზე.


წყარო: http://hotnews.ge