_ უკვე თითქმის 10 წელი გავიდა მას შემდეგ რაც აქტიურად ჩავერთე ლეიბორისტულ პარტიაში და ზოგადად პოლიტიკურ პროცესებში. ვარ 6 არჩევნების სტაჟის მქონე და აგერ უკვე მეშვიდეც მოგვადგა კარს. 2011-ში, როცა 18 წლის გამოუცდელი, ცხოვრებისეული გზის ძიების პროცესში მყოფი ახალგაზრდა მოვედი პარტიაში, ნამდვილად არ მქონდა ბოლომდე გააზრებული რა მიმართულებით წარიმართებოდა ჩემი ცხოვრება მომავალში, თუმცა დღევანდელი გადმოსახედიდან თამამად შემიძლია ვთქვა, გზა რომელსაც 2011-ში დავადექი, იყო საუკეთესო არჩევანი რაც კი შეიძლებოდა გამეკეთებინა. განვლილი წლების განმავლობაში, მივიღე ისეთი ტიპის გამოცდილება, რასაც ალბათ სხვაგან ვერასდროს და ვერსად მივიღებდი, გავიცანი იმდენად საინტერესო, მრავალფეროვანი და განსხვავებული ხალხი, რომელთა მსგავსის არსებობის შესახებ ალბათ ცხოვრების ბოლომდე ვერაფერს შევიტყობდი. გავხდი ისეთი გუნდის წევრი, რომელიც გულწრფელად, თავდაუზოგავად იბრძვის პოზიტიური ცვლილებებისთვის და ქვეყნის უკეთესი მომავლისთვის. შემდეგ შევძელი და ჩამოვაყალიბე ამ ღირსეული გუნდის შიგნით კიდევ ერთი ახალი გუნდი, ენერგიული და მოტივირებული ახალგაზრდებით სავსე, რომლებიც ყოველდღიურად მაძლევენ უდიდეს სტიმულს, მოტივაციას და რომელთა გარეშეც ძალიან რთულად წარმომიდგენია საკუთარი თავი.