,,აბა, რაღა საზოგადოდ თქმულ მონაზე მიჭერენ და ხან ციხეში და ხან 3000 ლარიანი ჯარიმით მისტუმრებენ ?! პოლიციელების კრიტიკაზეც „ნარუშილოვკები“ გაიცემა?” _ კითხულობს უფლებადამცველი, ლეიბორისტული პარტიის წევრი ლაშა ჩხარტიშვილი შს მინისტრის, გომელაურის განცხადებაზე, რომ ლევან იზორიას საქციელი პატრულთან მიმართებაში, დანაშაული არ იყო.

შინაგან საქმეთა მინისტრი, ვახტანგ გომელაური მიიჩნევს, რომ ყოფილი მინისტრის, ლევან იზორიას ძმის საქციელი პატრულთან ინციდენტის დროს დანაშაული არ არის. მისივე თქმით, ვახო იზორიას ფრაზა პატრულისადმი: “ფორმას გაგხდი”, დანაშაული არ იყო. ამის შესახებ მან დღეს, 28 იანვარს ჟურნალისტებთან კომენტარისას თქვა:

“არ აგინებს, აგრესიული საუბარი იყო… ხელითაც არ შეხებია”.

მინისტრი აპელირებს იმით, რომ ვიდეოს პირველი ნაწილის ნახვა იქნებოდა საინტერესო და ვარაუდობს, რომ იქნებ მანამდე ესენი [პატრულის თანამშრომლები] აყენებენ შეურაცხყოფას.

“რატო გაუშვა მერე [პატრულმა], დანაშაული ჩაიდინა მაშინ. ვინ გააშვებინა? მძღოლმა? კარგი რა, რა სისულელეა?” — ამბობს შს მინისტრი.

ვახტანგ გომელაურის თქმით, ეს ფაქტი ინციდენტის დროს შეიტყო და ფიქრობს, რომ “უმნიშვნელოა”.

“ასეთი რაღაც ხდება უამრავი, მათ შორის, აქციებზე და მაშინაც არ ვაკავებთ”.

23 იანვარს მთავარი არხის მიერ გავრცელებულ ვიდეომასალაში ჩანს, თუ როგორ აკავებს საპატრულო პოლიციის თანამშრომელი მაშინდელი შინაგან საქმეთა მინისტრის მოადგილის, ლევან იზორიას ძმას და როგორ აიძულებენ მის გათავისუფლებას ჩარევის შემდეგ. ვიდეო ტელევიზიას იმ პოლიციელმა მიაწოდა, რომელმაც 2014 წელს იზორიას ძმა დააკავა.

კადრებში ჩანს, როგორ უხსნის პოლიციელი გიორგი დვალიშვილი მაღალჩინოსნის ძმას, რომ საჯარო სივრცეში არ უნდა იგინებოდეს, რამაც ის გააღიზიანა და გინება გააგრძელა. ამის შემდეგ პოლიციელი მას განუმარტავს, რომ წვრილმანი ხულიგნობისთვის აკავებს, რაზეც პასუხად იღებს: “მიდი დავაი”. თუმცა, მას შემდეგ, რაც პოლიციელი მისკენ ბორკილებით მიდის ის გაკვირვებულია, წინააღმდეგობას უწევს მას და ამბობს, რომ ლევან იზორიას ძმა არის.

წყარო: https://euronews.ge