იმედია, ეს იქნება იმ პროცესის დასაწყისი, რომელიც მიგვიყვანს ივანიშვილის რეჟიმის სრულ დემონტაჟთან - ეს განცხადება, „ლეიბორისტული“ პარტიის ლიდერმა, შალვა ნათელაშვილმა პარლამენტთან მიმდინარე აქციაზე გააკეთა.

შალვა ნათელაშვილი რუსი დეპუტატების საქართველოში ვიზიტს გამოეხმაურა. მისი თქმით, დღეს საქართველომ მთელს მსოფლიოს დაანახა, რომ არ შეეგუება არც ერთი სანტიმეტრი ქართული მიწის ოკუპაციას.

„დღეს მოხდა მთავარი. პუტინმა და ივანიშვილმა თბილისის თავზე ვერ ააფრიალეს წითელი დროშა. ეს არის ამ მაგარი და დიდი ხალხის, ჩვენი საზოგადოების დამსახურება. იმედია, ეს იქნება იმ პროცესის დასაწყისი, რომელიც მიგვიყვანს ივანიშვილის რეჟიმის სრულ დემონტაჟთან, სრულ დეოლიგარქიზაციასთან, როდესაც უზნეობა, კორუფცია, არა პატრიოტიზმი, ტყუილი წავა ქართული საზოგადოებიდან, პოლიტიკიდან, ჩვენი ცხოვრებიდან და რა თქმა უნდა, თავისი კონკრეტული შემსრულებლებით... რაც მთავარია, ამ სპიკერის სავარძელში უკვე 7 წელია, ზის პუტინი, არა მარტო გავრილოვი. პრეზიდენტის სავარძელში პუტინი ზის, პრემიერს სავარძელში პუტინი ზის, სოლოლაკში პუტინი ზის“ - განაცხადა შალვა ნათელაშვილმა.